2. Adjectif
3. Autres
4. Lexique
5. Locution
6. Nom propre
7. Substantif et adjectif masculin
8. Substantif féminin
9. Substantif masculin
10. Substantif masculin ou féminin
11. Verbe

1. Par ordre alphabétique
2. Par noms d'auteurs
3. Par thèmes
4. Par ordre chronologique

1. 3 315 membres inscrits
2. 1 008 articles et documents
3. 2 490 messages (forums)

   ---

4. 39935 visites depuis 11/05/2017

Que vault preschier au sourt qui goute n'oit ?
Que vault semer sur pierre le froument ?
Que vault monstrer a cellui qui ne voit ?
Que vault le lire a cellui qui n'apprant ?
Que vault enter sur tron qui ne reprant ?
Cilz pert son temps qui tele euvre pourchace,
Combien qu'aucuns dient communement :
C'est trop bien dit, mais querez qui le face.

Cilz qui bien scet et mal fait se deçoit
Et prandra mal a son definement ;
Et aussi fait cilz qui le bien dire oit,
Quant il n'en vient a nul amendement ;
Deceuz sont trop merveilleusement
Ceuls qui ainsi quierent mondaine glace ;
Mieulx leur vausist querir leur sauvement.
- C'est trop bien dit, mais querez qui le face.

Que vault li homs qui autrui mal perçoit
Et ne voit pas son propre encombrement^(a),
Et qui en lui pour son preu^(b) ne conçoit
La parole de bon entendement ?
Autant vauldroit oir venter le vent ;
Car telz gens ont toudis un pié sur glace,
Qui se muent de moment en moment.
- C'est trop bien dit, mais querez qui le face.

Par le prescheur⁽¹⁾ entens justice et droit
Que l'en doit faire a tous generalment ;
Par la pierre qui nul fruit ne reçoit
Les mauvais cuers de ce monde present,
Et par le grain le bon dit du preschant,
Et par le sourt cil qui tourne sa face,
Par l'aveugle le mal gouvernement :
C'est trop bien dit, mais querez qui le face

Par le liseur cil qui ne se congnoit,
Par le viez tronc cuer plus dur d'aymant^(c),
Et par l'ente, douçour qu'om esperoit,
Que je bois sec destruit et va seichant.
Or y pensons, las, dolereus, meschant,
Qu'a paine voy nul qui ne se mefface,
Et nous deusson tuit vivre sainctement.
- C'est trop bien dit, mais querez qui le face.

L'ENVOY

Prince, au jour d'ui est tel gouvernement
Que li menteur et li dissimulant
Ont tous les biens et du monde la grace,
Et li bon sont vil, povre et indigent,
Que j'en deust amer sur toute gent,
C'est trop bien dit, mais querez qui le face.

Notes

(1). prescheurs.

(a). Mal.

(b). Profit, gain.

(c). Que diamant.